Ֆուտբոլային նորություններ

Դորտմունդի «Բորուսիայի» եւ Գերմանիայի հավաքականի կիսապաշտպան Իլկայ Գյունդոգանը կդառնա «Մանչեսթեր Յունայթեդի» խաղացող, հաղորդում է Metro-ն։ 24-ամյա ֆուտբոլիստը համաձայնության է հասել անգլիական ակումբի հետ։ Գյունդոգանը բանակցություններ է վարել նաեւ Մյունխենի «Բավարիայի» եւ «Բարսելոնայի» հետ։

Ավարտված մրցաշրջանում Գյունդոգանը «Բորուսիայի» կազմում անցկացրել է 33 հանդիպում, խփել է 3 գնդակ, կատարել է 5 արդյունավետ փոխանցում։

Մադրիդի «Ռեալը» «Մանչեսթեր Յունայթեդին» մերժել է ուելսցի կիսապաշտպան Գարեթ Բեյլի ու ֆրանսիացի պաշտպան Ռաֆայել Վարանի տրանսֆերների հարցով:

Cuatro-ի համաձայն՝ 2 ֆուտբոլիստներին ձեռք բերելու համար անգլիական ակումբն առաջարկել է 150 միլիոն եվրո: Արքայական ակումբը պատասխանել է, որ 25-ամյա Բեյլն ու 22-ամյա Վարանը չեն վաճառվում:

Մյունխենի «Բավարիան» հետաքրքրված է Դոնեցկի «Շախտյորի» բրազիլացի կիսապաշտպան Դուգլաս Կոստայի նկատմամբ եւ ամառային տրանսֆերային պատուհանի ժամանակ կփորձի ձեռք բերել նրան, հաղորդում էBild-ը։

Ուկրաինական ակումբը Դուգլաս Կոստայի տրանսֆերը գնահատում է 25 միլիոն եվրո։

Կիսապաշտպանությունում Արյեն Ռոբենի եւ Ֆրանկ Ռիբերիի փոխարեն համալրում փնտրող գերմանական ակումբը դիտարկում է նաեւ Մադրիդի «Աթլետիկոյի» ֆրանսիացի խաղացող Անտուան Գրիզմանի եւ «Մանչեսթեր Յունայթեդի» արգենտինացի կիսապաշտպան Անխել Դի Մարիայի թեկնածությունները։

Դուգլաս Կոստային ձեռք բերելու մտադրություն ունի նաեւ Լոնդոնի «Չելսին»։

Չեմպիոնների լիգայի եզրափակիչը կլինի վերջին հանդիպումը իտալացի կիսապաշտպան Անդրեա Պիրլոյի համար Թուրինի «Յուվենտուսում»։ 36-ամյա ֆուտբոլիստը կարիերան կշարունակի ՄԼՍ-ի «Նյու Յորք Սիթի» ակումբում, հաղորդում էAS-ը։

Ավելի վաղ, Պիրլոն նշել էր, որ ցանկանում է տեղափոխվել ԱՄՆ։ Նա դիտարկել է նաեւ Քաթարում կարիերան շարունակելու տարբերակ, սակայն ընդունել է «Նյու Յորք Սիթիի» առաջարկը։

Պիրլոն 2011-ից է հանդես գալիս «Յուվենտուսում»՝ 4 անգամ նվաճելով Իտալիայի չեմպիոնի տիտղոսը։

«Լիվերպուլը» պաշտոնապես հայտարարել է «Մանչեսթեր Սիթիի» անգլիացի կիսապաշտպան Ջեյմս Միլների տեղափոխության մասին:

29-ամյա Միլները «Լիվերպուլի» հետ պայմանագիր կնքի հուլիսի 1-ին, երբ կավարտվի նրա համաձայնագիրը «Մանչեսթեր Սիթիի» հետ եւ կստանա ազատ գործակալի կարգավիճակ:

Անգլիացին 2010-ին «Աստոն Վիլայից» էր տեղափոխվել մանչեսթերյան ակումբ, որի կազմում այս մրցաշրջանում մասնակցել է 45 խաղի եւ դարձել է 8 գոլի հեղինակ: Նա Անգլիայի ազգային հավաքականում անցկացրել է 51 խաղ, խփել է մեկ գոլ: